Croeso i Camau - Newyddlen Menter Iaith Sir y Fflint!
Ein bwriad yw cyhoeddi newyddlen chwarterol i gadw mewn cysylltiad gyda chi ein haelodau, ein partneriaid a’n cefnogwyr. Gobeithiwn hefyd ddenu mwy atom trwy roi blas o’r gwaith rydym yn ei gyflawni a’r gweithgareddau fydd gennym ar y gweill. Mae’r Fenter yn perthyn i bawb sydd yn byw ac yn gweithio yn y Sir ac rydym yn awyddus i dderbyn syniadau gennych chi a’ch barn am ein gweithgareddau.
Harri Bryn Jones – Cadeirydd; Gwawr Cordiner – Prif Swyddog
Camau Cyntaf
"Kids Soak It Up"
Ymgyrch Marchnata Addysg Gymraeg
"Mae plant bach yn dysgu iaith yn rhwydd. Maen nhw’n sugno iaith fel mae sbwng yn sugno dŵr."
Cawsom nifer o weithgareddau yn ardaloedd Treffynnon a Bwcle i hyrwyddo manteision addysg cyfrwng Cymraeg i rieni newydd a darpar rieni.
- Sioe Bypedau gyda Cwmni Cortyn yng Nghanolfan Hamdden Treffynnon
- Sesiwn Miwsig Meithrin yn Hen Lyfrgell Helygain
- Parti Sali Mali yng Nghylch Ti a Fi Bwcle
- Sesiwn Crefftau Sul y Mamau gyda Mari Gwent yng Nghylch Ti a Fi Maesglas
- Dosbarthu bagiau gwybodaeth yn archfarchnad Tesco, Treffynnon ar Ddydd Gwyl Dewi
Eisteddfod Y Dysgwyr Gogledd Ddwyrain Cymru
Ehangwyd y dalgylch eleni i gynnwys Sir Ddinbych a Wrecsam mewn cydweithrediad gyda Mentrau Iaith Maelor a Dinbych. Ar nos Wener yr 22ain o Chwefror roedd ffreutur Coleg Glannau Dyfrdwy dan ei sang o gystadleuwyr brwd. Llongyfarchiadau mawr i Peter Jones Yr Orsedd, Wrecsam ar ennill y gadair am y trydydd tro - Coron Driphlyg! Bydd Eisteddfod y Dysgwyr yn teithio o amgylch y tair sir yn eu tro, a Sir Ddinbych fydd yn croesawu’r Eisteddfod yn 2009.
Jan Wilson Jones yn beirniadu’r gystadleuaeth goginio
Galwch heibio ein Sesiynau Sgwrs:
- Pafiliwn y Fflint - Dydd Mercher - 10.30
- Neuadd y Sir, Yr Wyddgrug - Dydd Iau - 12.30
- Coleg Glannau Dyfrdwy - Dydd Mercher - 12.30
- Tafarn Y Castell Rhuthun, Yr Wyddgrug -Nos Fercher -20.30
Dechreuwyd y dathlu gyda Noson Blygeiniol yn y festri Capel Bethesda, Yr Wyddgrug. Cawsom dywydd bendigedig Ddydd Sadwrn, 12fed Ionawr ar gyfer ein taith gerdded deuluol i draeth a thwyni Talacre, dan ofal Iwan Roberts o Gymdeithas Edward Llwyd Am fwy o wybodaeth am deithiau cerdded yn yr ardal cysylltwch â Cymdeithas Edward Llwyd.
Aelodau a Staff ar y Daith Gerdded yn Nhalacre
Rhys Jones, Caryl Parry Jones a Gwawr Cordiner yn dymuno Penblwydd Hapus i’r Fenter
Delwedd Newydd i'r Dyfodol
Lansiwyd ein logo newydd yn ystod Parti Dathlu’r Deg sydd yn adlewyrchu delwedd ffres a chyfoes y Fenter. Mae’r logo yn ddatblygiad o’r un gwreiddiol oedd yn seiliedig ar Bont Sir y Fflint, ac yn symbol o waith y Fenter yn ceisio pontio rhwng siaradwyr Cymraeg, Dysgwyr a’r Di-Gymraeg o fewn y Sir. Diolch i gwmni Clic am gydweithio gyda’r staff a’r cyfarwyddwyr ar y gwaith dylunio.
Iaith ar Daith
2008
Hon yw’r ail wythnos o’r fath i’w threfnu gan bartneriaid sy’n gweithio trwy’r Gymraeg yn Sir y Fflint er mwyn hyrwyddo’r defnydd o’r iaith ym mhob sector. Ein partneriaid ar y daith yw Prifysgol Cymru Bangor, Popeth Cymraeg, Merched y Wawr, Mudiad Ysgolion Meithrin, TWF, Yr Urdd, Menter a Busnes, Cyngor Sir y Fflint, Bwrdd yr Iaith, Coleg Garddwriaeth Cymru, Canolfannau Cymraeg i Oedolion, Coleg Harlech, Coleg Glannau Dyfrdwy, Gwyl Cadi Ha, Clwb Ffermwyr Ifanc a Gwyl Werin Tegeingl. Dyma rai o’r gweithgareddau amrywiol yn ystod wythnos 26ain Ebrill - 3ydd Mai 2008:
Cwrs Gosod Blodau trwy gyfrwng y Gymraeg yng nghwmni'r awdures a’r cyflwynydd teledu Bethan Gwanas. Mae Bethan ar hyn o bryd yn brysur yn ffilmio ar gyfer cyfres newydd o’r rhaglen ‘Byw yn yr Ardd’ a fydd yn cael ei ddarlledu ar S4C ym mis Mehefin.
Lansio Polisi Iaith Gymraeg Bwyty Alchemy yn Nercwys yng nghwmni Gwinology. Cyfle i fusnesau lleol gael gwybodaeth gan y Fenter Iaith a Bwrdd yr Iaith ar sut i ddefnyddio‘r Gymraeg er lles eu busnes a’r gefnogaeth sydd ar gael iddynt i farchnata yn ddwyieithog.
Hwp Ha Wen! - Gŵyl Cadi Ha
Diweddglo’r wythnos brysur fydd yr 11eg ŵyl Cadi Ha yn Nhreffynnon fore Sadwrn y 3ydd o Fai am 10.15yb gyda channoedd o blant ysgolion lleol yn cadw’r hen draddodiad yn fyw, gan ddod a chanol tref Treffynnon yn fwrlwm o liw a dawns. Bydd y dawnswyr wedyn yn symud ymlaen i ddawnsio y tu allan i Blas Pen Ucha’ Caerwys sef cartref y Foneddiges Herbert Lewis a recordiodd y fersiwn hynaf sydd gennym o Gân y Cadi Ha yn wyrcws Treffynnon ar ddechrau’r 1900au. Byddwn wedyn yn symud ymlaen i ddawnsio ar Sgwâr Caerwys am 2.45yp yng nghwmni Côr Caerwys, cyn gorffen gyda thwmpath y Calan Mai yn Neuadd Yr Eglwys, Yr Wyddgrug am 7.30yh. Croeso cynnes i chi ymuno yn y dawnsio neu ddod i wylio!Sicrhau Adnoddau
Llwyddodd y Fenter i sicrhau grant gan Gronfa Arian i Bawb y Loteri. Bydd y grant yn ein galluogi i fuddsoddi mewn adnoddau a thechnegau marchnata newydd ac arloesol a fydd yn sicrhau cyfranogiad ehangach i’n gweithgareddau a’n prosiectau o fewn cymunedau Sir y Fflint.
Gŵyl Tegeingl Awst 15-17
Mae’r Fenter Iaith yn falch o gynnig cefnogaeth weinyddol i’r prosiect cyffrous newydd yma. Gŵyl traddodiadau celfyddyd gyhoeddus fydd Tegeingl.Pan ddaeth y Rhufeiniaid i'r ardal hon, y Decangli oedd y llwyth Celtaidd brodorol. Wedi i’r Rhufeiniaid adael daeth yr ardal i’w hadnabod dan yr enw Tegeingl ar ôl y Decangli, sy’n cyfateb yn fras i ran helaeth o Sir y Fflint heddiw. Bydd Gŵyl Tegeingl yn adlewyrchu’r gelfyddyd a’r diwylliant gwerin gyfoethog sydd wedi datblygu a goroesi yma. Mae lleoliad Tegeingl/Sir y Fflint ar y ffin yn golygu bod cymysgedd cyfoethog ac unigryw iawn o hanes, treftadaeth a chelfyddyd yn yr ardal. Bydd caneuon, alawon, dawnsfeydd a chwedlau gwerin traddodiadol a chyfoes yn cael llwyfan ochr yn ochr â chyfraniadau o wledydd eraill. Bydd y prif lwyfan wedi ei osod mewn Marquee ar gaeau Clwb Rygbi’r Wyddgrug. Bydd yno le i gynnal cyngherddau, cystadlaethau a thwmpathau dawns.
Cofiwch ymweld â www.tegeingl.com am fwy o wybodaeth ac i archebu’ch tocynnau.
Gobaith Tegeingl - Gŵyl y Werin Gudd yw datguddio rhyfeddodau i bawb
Ymaelodi â’r Fenter
Cwmni Cyfyngedig trwy warant yw Menter Iaith Sir y Fflint gyda chwe Cyfarwyddwr, pedwar aelod o staff a 50 o aelodau. Prif nod y cwmni yw "hybu ac ehangu’r defnydd o’r Gymraeg yn Sir y Fflint" ac rydym yn ymwybodol iawn mae dim ond trwy gefnogaeth gwirfoddolwyr ar draws y Sir y mae modd i ni gyflawni ein hamcanion. Mae aelodaeth yn agored i unrhyw un sydd yn rhannu’r weledigaeth a gwahoddir yr holl aelodau i Gyfarfod Blynyddol sydd yn ethol Cyfarwyddwyr. Os hoffech chi ymlaelodi â’r Fenter, dilynwch y ddolen isod.Cyfarfod Blynyddol Mehefin y 12fed
Byddwn yn ymgynghori gydag aelodau’r Fenter cyn cadarnhau cyfansoddiad newydd i’w fabwysiadu yn ein Cyfarfod Blynyddol nesaf yn Dyfodol@Treffynnon ar Fehefin y 12fed am 7.00 yh. Cewch gyfle i sgwrsio gyda staff a Chyfarwyddwyr am unrhyw weithgareddau yr hoffech inni gynnal yn ystod y flwyddyn. Ein siaradwr gwadd fydd Prif Arolygydd Adran Gymraeg Heddlu Gogledd Cymru, Mr Ray Hughes. Bydd yn rhoi sgwrs i ni ar ymrwymiad yr Heddlu i’w Cynllun Iaith Gymraeg ac i ddwyieithrwydd o fewn yr Heddlu, hyn oll er mwyn sicrhau eu bod yn cynnig gwasanaeth cynhwysfawr i gymunedau dwyieithog yng Ngogledd Cymru.
